विशेष अदालतले बागमती प्रदेश खानेपानी तथा सरसफाइ डिभिजन कार्यालय रामेछापका इन्जिनियर नवराज सत्याललाई तीन वर्ष कैद सजाय सुनाएको छ । 

सेवाग्राहीसँग घुस लिइरहेको अवस्थामा पक्राउ परेका सत्याललाई अदालतले तीन वर्ष कैद र २० लाख ६० हजार रुपियाँ जरिबाना गरेको छ । 

यस्तै सत्यालसँगै पक्राउ परेका बखतबहादुर थापालाई डेढ वर्ष कैद सजाय सुनाएको छ । 

अख्तियार दुरुपयोग अनुसन्धान आयोगले सत्याल र थापालाई २८ लाख रुपियाँ घुससहित पक्राउ गरेको थियो । २०७९ मङ्सिर २६ गते दुवैविरुद्ध अख्तियारले विशेषमा मुद्दा दायर गरेको थियो ।

न्यायाधीश यमुना भट्टराई र बलभद्र बास्तोलाको इजलासले शुक्रबार सजाय निर्धारण गरेको हो । कात्तिक १७ गते अदालतले कसुर ठहर गरेको थियो । 

विशेष अदालतका प्रवक्ता धनबहादुर कार्कीले सत्याललाई तीन वर्ष कैद र २० लाख ६० हजार जरिबाना तथा थापालाई डेढ वर्ष कैद र सात लाख ४० हजार रुपियाँ जरिबाना भएको जानकारी दिए । 

खानेपानीसम्बन्धी  आयोजनाको  भुक्तानीका  लागि  सेवाग्राहीसँग  घुस  लिइरहेको  अवस्थामा  अख्तियारको  टोलीले  २०७९  कात्तिक  २  गते  दुवै  जनालाई  नियन्त्रणमा  लिएको  थियो  ।  सत्याल  तह  आठका इन्जिनियर र थापा प्लम्बर हुन् ।  । सत्याल र थापाले सेवाग्राहीबाट १६ लाख नगद र १२ लाख रुपियाँको चेक लिइरहेको अवस्थामा पक्राउ गरेको थियो  ।