आज ६० औं ‘इन्जिनियर्स डे’, नेएको कार्यक्रम प्रधानमन्त्रीले उद्घाटन गर्ने

आज ६० औं ‘इन्जिनियर्स डे’, नेएको कार्यक्रम प्रधानमन्त्रीले उद्घाटन गर्ने


इन्जिनियर्स नेपाल |  साउन ३, २०७९,


engineersnepal.com

मुलुकभरका करिक ३६ हजारभन्दा बढि इन्जिनिरहरुको छाता संस्था नेपाल इन्जिनियर्स एशोसिएसन (नेइए)ले मंगलवार ६० औं इन्जिनियर्स डे अर्थात् इन्जिनियर दिवस मनाउँदैछ । दिवसको पुर्वसन्ध्यामा विभिन्न कार्यक्रम गरेको नेइएले मंगलवार औपचारिक रुपमा कार्यक्रम गरेर यो दिवस मनाउन लागेको हो । 


‘इन्जिनियर्स फर सोसाइटल इम्पावरमेन्ट’ नारासहित मंगलवार काठमाडौंको कमलादीस्थित प्रज्ञा भवनमा औपचारिक कार्यक्रमको आयोजना हुने भएको छ । त्यस्तै एशोसिएसनका सातै प्रदेशहरुले पनि प्रदेश राजधानीमा पनि कार्यक्रमको आयोजना गरेका छन् ।


ADVERTISEMENT

प्रधानमन्त्री शेरबहादुर देउवाले दिवसको उद्घाटन गर्ने कार्यक्रम तय भएको नेइएले जनाएको छ । देउवासहित, भौतिक पुर्वाधार तथा यातायात मन्त्री मोहमम्द इतियाक राईलगायत सरकारका सचिवहरुसहित पुर्व उच्च पदाधिकारी, विशिष्ठ व्यक्तिहरुको उपस्थितिमा कार्यक्रम गरिने नेइएका उपमहासचिव सरोज धितालले जानकारी दिए । 


दुईवटा सत्रमा हुने कार्यक्रमको पहिलो सत्र उद्घाटन र दोस्रोमा महत्वपूर्ण २ वटा विषयमा प्यानल छलफल हुने पनि उनले बताए । उक्त अवसरमा पुर्वअर्थमन्त्री, राजनीतिज्ञ, मेयर तथा अन्य पदाधिकारीसहित प्यानल छलफल हुनेछ । उद्घाटन सत्रपछि सञ्चालन हुने प्राविधिकमा ‘सहरी विकासमा फोहोर व्यवस्थापन’का विषयमा विज्ञसहितको छलफल हुनेछ । यो सत्रमा पुर्वअर्थमन्त्री बाबुराम भट्टराई, कांग्रेस नेता गगनकुमार थापा र काठमाडौं महानगरपालिकाका मेयर बालेन्द्र साह (बालेन)को उपस्थिति हुनेछ । 


यसैगरी दोस्रो कार्यक्रममा स्थानीय तहमा इन्जिनियरले कसरी सेवा प्रवाह गर्न सक्छन् भन्ने विषयमा छलफल हुनेछ । यस्तै हरेक वर्ष जस्तै यो वर्ष पनि विभिन्न ७ वटा विधामा पुरस्कार तथा सम्मान गरिने कार्यक्रम रहेको धितालले बताए । इन्जिनियरिङ क्षेत्रमा विशिष्ठ योगदान दिने र इनोभेसनमा काम गरेकालाई सम्मान तथा अबार्ड प्रदान गरिने कार्यक्रम रहेको पनि उनले बताए ।


यसका साथै नेइएले दिवसको पुर्वसन्ध्यामा विभिन्न कार्यक्रम आयोजना गरेको थियो । खासगरी नेइएले विभिन्न कलेजबाट भर्खर पासआउट भएका विद्यार्थीहरुलाई लक्षित गरेर करियर काउन्सिलीङ कार्यक्रम सञ्चालन गरेको उनको भनाइ छ । यस्तै नेइएले रक्तदान, चेस र इन्जिनियर्स म्याराथन कार्यक्रम पनि आयोजना गरेको थियो । असार ३२ गते गरेको रक्तदान कार्यक्रममा ८४ जना इन्जिनियर र आर्किटेक्टहरुले रक्तदान गरेका थिए ।

सो कार्यक्रममा नेइएका पूर्वमहासचिव तथा नेपाल आयल निगमका कार्यकारी निर्देशक ई.उमेश प्रसाद थानीले चेस प्रतियोगिता र इन्जिनियर्स म्याराथन २०७९ का बिजेताहरुलाई पुरस्कार बितरण गरे ।



Your Comments