औद्योगिक सर्वेक्षणमा पहिलोपटक तीन क्षेत्र समावेश

औद्योगिक सर्वेक्षणमा पहिलोपटक तीन क्षेत्र समावेश


इन्जिनियर्स नेपाल |  फागुन २९, २०७६, काठमाडौं


#
engineersnepal.com

‘राष्ट्रिय औद्योगिक सर्वेक्षण–२०७६’ मा औद्योगिक क्षेत्रका चारमध्ये थप तीनओटा क्षेत्रलाई पहिलोपटक समावेश गरिएको छ । औद्योगिक क्षेत्रको रूपमा विश्वव्यापी मान्यता पाइसकेका ‘खानी तथा उत्खनन, विद्युत् उत्पादन, प्रसारण तथा वितरण र पानीको आपूर्ति, ढल निकास, फोहोर व्यवस्थापन र त्यसको उपचारात्मक क्रियाकलाप’ जस्ता क्षेत्रलाई नेपालले पहिलोपटक औद्योगिक सर्वेक्षणमा समावेश गरेको हो । 

सर्वेक्षणमा पहिला नसमेटिएका तीन क्षेत्रहरूमा विस्तारै लगानी, रोजगारी सृजना बढ्दै गएको र कुल गार्हस्थ्य उत्पादन (जीडीपी)मा योगदान दिन सक्ने सम्भावनामूलक क्षेत्र भएकाले सर्वेक्षणमा समेटिएको हो । २०२० सालदेखि ठूला उद्योगहरूको औद्योगिक गणना शुरू गरेको तथ्यांक विभागले त्यसको साढे ५ दशकपछि एकीकृत रूपमा चारओटै क्षेत्रलाई समावेश गरेको छ । यसभन्दा पहिला ‘उत्पादनमूलक’ क्षेत्रलाई मात्रै समेटेर केन्द्रीय तथ्यांक विभागले औद्योगिक सर्वेक्षण तथा गणना गर्दै आएको थियो । 


ADVERTISEMENT

योसँगै नेपालले पनि संयुक्त राष्ट्र संघ (यूएन)को औद्योगिक विकास निकाय (यूएनआईडीओ)ले स्थापित गरेका सबै औद्योगिक क्षेत्रलाई कार्यान्वयनमा ल्याएको छ । अन्तरराष्ट्रिय स्तरमा ‘औद्योगिक उत्पादन’लाई मात्रै लिएर औद्योगिक क्षेत्रको सर्वेक्षण तथा गणना गरिँदैन । नेपालले हालसम्म विभिन्न समयमा गरी १० पटक ठूला उद्योग तथा प्रतिष्ठानको गणना सम्पन्न गरिसकेको छ । पछिल्लो पटक विभागले ठूला उद्योग तथा प्रतिष्ठानको सर्वेक्षण २०६९ सालमा गरेको थियो भने सानाको २०६६ मा गरेको थियो ।

२०२९ सालदेखि साना उत्पादनमूलक उद्योगलाई मात्रै लक्षित गरे गणना शुरू गरेको विभागले हालसम्म यस्ता उद्योगमा ५ पटक मात्रै सर्वेक्षण गरेको छ । पहिला ठूला र साना उद्योगको रूपमा औद्योगिक गणना सर्वेक्षण छुट्टाछुट्टै गरिन्थ्यो । अब भने यी दुवैखाले सर्वेक्षण तथा गणनालाई एकीकृत गरी ठूला र साना सबैखाले औद्योगिक क्षेत्रको सर्वेक्षण शुरू गरिएको विभागका महानिर्देशक नेबिनलाल श्रेष्ठले जानकारी दिए । 

आर्थिक अभियान दैनिकबाट

 



Your Comments