कालो सूचीमा राखिने र ठेक्का रद्द गरिने प्रावधान संशोधन गर्न व्यवसायीको माग

कालो सूचीमा राखिने र ठेक्का रद्द गरिने प्रावधान संशोधन गर्न व्यवसायीको माग


इन्जिनियर्स नेपाल |  माघ २२, २०७६, काठमाडौं


#
engineersnepal.com

नेपाल निर्माण व्यवसायी महासंघले पूर्वाधार निर्माणमा उल्झन खडा गरिरहेका ऐन–नियम परिमार्जन गर्नुपर्ने माग गरेको छ । 

सडकलगायत पूर्वाधार निर्माणमा देखिएको समस्याबारे प्रतिनिधिसभा, विकास तथा प्रविधि समितिलाई जानकारी गराउँदै प्रतिनिधिमण्डले धरौटी रकम जफत हुने, सम्झौता अंकको १० प्रतिशत रकम शोधभर्नाबापत असुल गरिने, एक वर्षदेखि तीन वर्षसम्म कालो सूचीमा राखिने र ठेक्का रद्द गरिने प्रावधान संशोधन गर्न सुझाव दिएको हो ।


ADVERTISEMENT

महासंघको केही दिन अघि भक्तपुरमा सम्पन्न २१ औँ साधारणसभामा पारित एजेन्डाबारे जानकारी गराउँदै अध्यक्ष रवि सिंहको नेतृत्वमा रहेको प्रतिनिधिमण्डलले सभापति कल्याणी खड्का  र सदस्यहरुलाई ठेक्काबीचैमा छोडेमा सम्पन्न हुन बाँकी कामको लागत रकम निर्माण व्यवसायीको घरघरानाबाट असुल उपर गरिने र भ्रष्टाचारको मुद्दा चलाइने प्रावधान व्यवसायीमैत्री नभएकाले सुधारको माग गरेको हो।

सो अवसरमा सभापति खड्का र सदस्यहरुले चीनमा एक हजार शैय्याको अस्पताल छ दिनमा तयार हुने नेपालमा भने १५० मिटरको पुल बनाउन १५ वर्ष लाग्ने प्रवृत्तिको अन्त्य गर्न पूर्वाधार निर्माणमा दण्ड र सजाय लागू गर्ने विषयमा सहयोग पुर्‍याउन व्यवसायीलाई सुझाव दिए।

समितिका सदस्यहरुले तोकिएको समय सीमाभित्र आयोजना पूरा गर्न आफनो क्षमता बढाउन, ठेक्का पार्ने मात्र नियतले अत्यन्त कम रकममा बोलपत्र हाल्ने प्रवृत्ति रोक्न तथा कार्यतालिकाअनुसार काम नगर्ने ठेकेदारलाई दण्ड सजायको भागीदार बनाउने काममा सहयोग गर्न व्यवसायीलाई सल्लाह दिइन् ।

विकास निर्माणका काम गुणस्तरीय तुल्याउन स्वच्छ र पारदर्शी हुनुपर्नेमा जोड दिँदै सदस्यहरुले गलत काम गर्नेलाई व्यवसायबाटै पन्छाउने काममा सरकारलाई महासंघको सहयोगको आवश्यकता रहेको उनीहरुले सुझाव दिए ।



Your Comments